Kudu meksa mlebu

Yen kayu lawange omah

Mula buku lawange ngelmu

Yen awak sayah, selak kepingin mlebu omah

Nanging, yen pikiran buntu kenapa ora kepingin mlebu buku?

Malah mlayu!

Yen dak peksa mlebu, malah turu!

Nganeh- anehi tenan awakku!

Ani Safitri

Wewayanganmu

Embuh wiwit kapan wewayanganmu,

ngebeki pikiranku

Sedina- dina nora luput eling sliramu

Mung ati iki wedi milih sliramu

Ya mung sliramu, sing gawe tentreme ati

Ya mung sliramu, tamba pengine ati

Aku mung bisa nyenyuwun atimu marang Gusti

Kabeh dakpasrahake marang karsane

Ani Safitri

Caraku Seneng Basa Jawa

Sing diarani wong seneng,

ora ana wong ngerti

Sing diarani wong kepincut,

uga ora ana sing ngerti

kayata yen lagi “jatuh cinta”

hmm... ora bakal krasa!

Yen jare wonng jawa,

“Tresna Jalaran Saka Kulina”

oo... yen ngono aku kudu kulina!

Ani Safitri

Ben Tambah Tresna

Jarene, yen kerep apel marai tambah tresna

Nanging apa iya kaya mengkono?

Sanajan aku ora percaya,

nanging aku kepengin nyoba

ngapeli kampusku,

ben tambah tresna

Ani Safitri

Semarang Kaline Banjir

“Semarang Kaline Banjir”

Aku wis asring krungu tembung iku

Ya kepiye maneh, blakane aku cah Semarang!

Nalika udan, lumrah wae kaline banjir

Sing marai gumun,

Saiki yen udan ora mung kaline sing banjir

Ah! Nanging ya tetep wae,

“Semarang Kaline Banjir”

Ani Safitri

Medhia Sosial

Sabane bocah milenial, ya nyang medhia sosial

Sanajan aku dudu bocah milenial,

aku uga saba nyang medhia sosial

Jenenge medhia sosial,

Macem- macem sing nganggo, jelas macem- macem isine

Yen aku, dudu bocah milenial

uga arang ngumbar- umbar

pakulinanku mung dadi pengawas ing medhia sosial!

Wagu ta? Ya wis ben!

Ani Safitri

Tong Kosong

Sing gembar-gembor konservasi lingkungan?

Akeh!

Sing ora preduli lan pek enake dhewe?

Uga akeh!

Sing luwih aneh, aku kalebu ing golongane!

Ya sejatine padha ora krasa

Yen pribadhine wis dadi penganut

Penganut apa?

Penganut barang sisa sing ora bisa gapuk,

nganti limangatus taun suwene!

Ani Safitri

Ibu

isine wajan wis mateng

sapu wis kesel ngubengi latar

kemeja lan kaos wis padha lunyu

ora sambat....

jedhing wis mencep

jogan wis mengkilap

pitik- pitik wis padha kesumpelan lambene

ora sambat....

ora katon nesu

ora katon kesel

nanging, saka kisuting pakulitanmu ora bisa kok singidake

ibu...

Ani Safitri, Jangli 29/ 4/ 2019